Lög Nemendafélags Landbúnaðarháskóla Íslands

 

I. kafli - Nafn, aðsetur og félagar

1. gr.

Félagið heitir Nemendafélag Landbúnaðarháskóla Íslands, með kt: 430200-2910 og er félag nemenda við Landbúnaðarháskóla Íslands. Stjórn félagsins heitir Stjórn Nemendafélags Landbúnaðarháskóla Íslands, skammstafað NLbhÍ. Enskt heiti félagsins er the Student’s Council at the  Agricultural University of Iceland.

2. gr.

Félagar eru allir nemendur Landbúnaðarháskóla Íslands sem skráð hafa sig til náms og greitt skráningargjald við skólann.

3. gr.

Aðsetur Nemendafélags Landbúnaðarháskóla Íslands skal vera í Landbúnaðarháskóla Íslands á Hvanneyri. Varnarþing félagsins er á Hvanneyri, Borgarfirði. Starfrækt skal sérstakt nemendafélag á Reykjum í Ölfusi samanber 23. gr. þessara laga. Skal það félag vera fulltrúi NLbhÍ á Reykjum.

 

II. kafli - Tilgangur

4. gr.

Nemendafélag Landbúnaðarháskóla Íslands skal gæta hagsmuna nemenda í hvívetna og vera málsvari þeirra jafnt innan sem utan LbhÍ. Nemendafélagi Landbúnaðarháskóla Íslands ber að hafa yfirumsjón með félagsstarfi innan skólans og hafa samskipti við önnur félög og hreyfingar námsmanna sem taka til háskóla- og framhaldsskólastigs innanlands sem utan.

 

5. gr.

Tilgangi sínum hyggst Nemendafélag Landbúnaðarháskóla Íslands ná með því að:

- Halda uppi öflugu sambandi við hagsmunaaðila.

- Tryggja virkt upplýsingastreymi innan Landbúnaðarháskóla Íslands.

- Virkja sem flesta félagsmenn til þátttöku í starfi félagsins.

 

III. kafli – Stjórn félagsins

6. gr.

Stjórn NLbhÍ er framkvæmdastjórn Nemendafélags Landbúnaðarháskóla Íslands .

Í stjórninni sitja átta kjörnir fulltrúar sem eru:

- Formaður, jafnframt fulltrúi nemenda í háskólaráði LbhÍ og í stjórn nemendagarða

- Gjaldkeri

- Ritari

- Fulltrúi fyrsta háskólastigs í kennslunefnd LbhÍ 

- Fulltrúi starfsmenntastigs Hvanneyrar í kennslunefnd starfsmenntastigs LbhÍ

- Ritstjóri heimasíðu NLbhÍ

- Fulltrúi nemenda á Reykjum

- Skemmtanastjóri NLbhÍ

 

Varamaður formanns er gjaldkeri. Varamaður gjaldkera er ritari. Aðrir varamenn eru ákveðnir innan stjórnar.

Allir fulltrúar, nema fulltrúi nemenda á Reykjum, ganga inn í stjórn á aðalfundi.  Fulltrúi nemenda á Reykjum gengur inn í stjórn að hausti.

7. gr.

Um störf stjórnar Nemendafélags Landbúnaðarháskóla Íslands:

- Formaður er í forsvari fyrir Nemendafélag Landbúnaðarháskóla Íslands, boðar til fundar stjórnar NLbhÍ og stýrir þeim. Hann situr einnig fundi háskólaráðs LbhÍ sem fulltrúi nemenda, sér um verkskiptingu innan stjórnar NLbhÍ og er fulltrúi nemenda í stjórn nemendagarða.

-   Ritari skráir fundargerðir stjórnar NLbhÍ. Hann heldur gerðarbók um starfsemi nemendafélagsins og sér um skjalasafn þess. 

- Gjaldkeri skal hafa yfirumsjón með öllum fjármálum Nemendafélags Landbúnaðarháskóla Íslands. Hann ber ábyrgð á fjármálum nemendafélagsins og er skylt að halda bókhald. Ákvörðunartaka um fjárhagslegar skuldbindingar í nafni Nemendafélags Landbúnaðarháskóla Íslands skal stjórn taka, hún getur þó veitt gjaldkera eða formanni það umboð.

- Fulltrúar nemenda í kennslunefndum LbhÍ, skulu gera grein fyrir þeim atriðum sem rædd eru á kennslunefndarfundum á stjórnarfundum Nemendafélags Landbúnaðarháskóla Íslands.

- Ritstjóri heimasíðu ber ábyrgð á heimasíðu Nemendafélags Landbúnaðarháskóla Íslands.

-  Skemmtanastjóri er formaður skemmtinefndar Nemendafélags Landbúnaðarháskóla Íslands og jafnframt formaður árshátíðarnefndar. Hann, ásamt skemmtinefnd heldur utan um og sér um félagslíf nemendafélagsins. Skemmtinefnd skal halda reglulega fundi.

 

8. gr.

Stjórnarfundir Nemendafélags Landbúnaðarháskóla Íslands skulu haldnir reglulega og skulu færðir til bókar. Ef stjórn NLbhÍ telur þörf á getur hún auglýst eftir eða falið nemendum tiltekin störf og gert tillögu um skipan þeirra. Nánari ákvæði um stjórnafundi Nemendafélags Landbúnaðarháskóla Íslands skal setja í reglugerð.

Einfaldur meirihluti ræður í atkvæðisgreiðslu í stjórn NLbhÍ. Ef meirihluti næst ekki í atkvæðagreiðslu innan stjórnar NLbhÍ, vegur atkvæði formanns tvöfalt.

9. gr.

Stjórn NLbhÍ skal stefna að því að skila rekstri nemendafélagsins hallalausum í lok hvers reikningsárs. Reikningsár Nemendafélags Landbúnaðarháskóla Íslands skal vera almanaksárið. Gjaldkeri gerir grein fyrir stöðu nemendafélagsins, og skilar bókhaldi á aðalfundi. Ársreikningur skal endurskoðaður af viðkenndum aðila fyrir hvern aðalfund.

 

IV. kafli - Embætti innan vébanda Nemendafélags Landbúnaðarháskóla Íslands

 

10. gr.

Sérhverjum nemenda við LbhÍ, eða hópi nemenda skal heimilt að stofna klúbb sem starfar innan Nemendafélags Landbúnaðarháskóla íslands, og skal stjórn NLbhÍ samþykkja stofnun hans svo lengi sem klúbburinn skaðar ekki ímynd nemendafélagsins og LbhÍ.

 

11. gr.

Alþjóðafulltrúi nemenda, skal gefa stjórn NLbhÍ skýrslu eftir fundi sína á erlendri grundu. Hann skal vinna í samstarfi við stjórn NLbhÍ og er kjörin til tveggja ára í senn.

 

12. gr.

Háskólanemar umhverfisdeildar eiga tvo fulltrúa er sitja deildarfundi Umhverfisdeildar LbhÍ. Háskólanemar auðlindadeildar eiga tvo fulltrúa er sitja deildarfundi Auðlindadeildar LbhÍ. Þessir fulltrúar eru skipaðir af stjórn NLbhÍ. Þeir skulu greina formanni NLbhÍ frá helstu atriðum fundarins til að stjórn NLbhÍ sé upplýst um stöðu mála.

 

13. gr.

Í árshátíðarnefnd situr skemmtinefnd fimm. Formaður árshátíðarnefndar er skemmtanastjóri NLbhÍ skv. 7. grein. Gjaldkeri og skemmtanastjóri bera ábyrgð á fjármálum árshátíðarnefndar. Þeim ber að leggja fram fjárhagsáætlun árshátíðar fyrir stjórn NLbhÍ, í síðasta lagi 2 vikum fyrir árshátíð. 

14. gr.

Nemendafélag Landbúnaðarháskóla Íslands er aðili að Landsamtökum Íslenskra Háskólanema, LÍH. Nemendafélag Landbúnaðarháskóla Íslands á einn fulltrúa í stjórn LÍH.

 

15. gr.

Kennslunefndarfulltrúar Nemendafélags Landbúnaðarháskóla Íslands eru fjórir og eru þeir valdir þannig: 

- Fulltrúi fyrsta háskólastigs í kennslunefnd LbhÍ.  Hann situr jafnframt í stjórn NLbhÍ og er kosinn samkvæmt 6. gr og 22.gr.

- Fulltrúi starfsmenntastigs Hvanneyrar í kennslunefnd starfsmenntastigs LbhÍ.  Hann situr jafnframt í stjórn NLbhÍ og er kosinn samkvæmt 6. gr og 22. gr.

- Fulltrúi starfsmenntastigs á Reykjum í kennslunefnd starfsmenntastigs LbhÍ.  Hann skal valinn samkvæmt 23. gr.

- Fulltrúi mastersnema.  Hann er kosinn á fundi í upphafi hvers skólaárs, þar sem allir mastersnemar eru boðaðir ásamt umsjónarmanni mastersnámsins.

 

V. kafli – Fundir

16. gr.

Aðalfund Nemendafélags Landbúnaðarháskóla Íslands skal halda í febrúar ár hvert á Hvanneyri. Til hans skal boða með viku fyrirvara hið minnsta. Á aðalfundarboði skal koma fram hvar og hvenær fundurinn er haldinn, auk dagskrár. Aðalfundur fer með æðsta vald félagsins. Fundurinn telst löglegur ef rétt er til hans boðað.

Dagskrá aðalfundar:

1.  Fundur settur

2.  Kosning fundarstjóra

3.  Formaður fer yfir starf ársins

4.  Gjaldkeri skilar skýrslu um fjármál ársins

5.  Lagabreytingar, ef einhverjar eru

6.  Önnur mál

7.  Stjórnarskipti

8.  Fundi slitið

 

17. gr.

Heimilt er að boða til aukaaðalfundar undir sérstökum kringumstæðum sé vilji meirihluta stjórnar NLbhÍ fyrir því. Einnig ef ¼ nemenda óskar eftir því skriflega við stjórn NLbhÍ, skal boða til aukaaðalfundar.

 

18. gr.

Kynningarfundur frambjóðenda í embætti Nemendafélags Landbúnaðarháskóla Íslands skal haldinn eigi síðar en kvöldið fyrir kjörfund. Þar skulu frambjóðendur kynntir.

 

19. gr.

Kjörfundur skal haldinn eigi síðar en degi fyrir aðalfund Nemendafélags Landbúnaðarháskóla Íslands.

 

VI. kafli – Kosningar

20. gr.

Kjörnefnd er skipuð af stjórn NLbhÍ. Kjörnefnd skal sjálf velja formann. Ef kjörnefndarmaður ætlar sér í framboð þá skal hann víkja úr kjörnefnd. Kjörnefnd ber ábyrgð á kosningum Nemendafélags Landbúnaðarháskóla Íslands. Hún sér um að auglýsa í embætti, boða til kjörfundar, telja atkvæði og birta úrslit. Framboð í embætti Nemendafélags Landbúnaðarháskóla Íslands þurfa að hafa borist til kjörnefndar, daginn fyrir kynningarfund, sjá 18. grein.

21. gr.

Allir nemendur LbhÍ hafa atkvæðisrétt í kosningum í embætti á vegum Nemendafélags Landbúnaðarháskóla Íslands. Nemendur á Hvanneyri kjósa í embætti á Hvanneyri, nemendur á Reykjum kjósa í embætti á Reykjum.

 

22. gr.

Á kjörfundi skal kjósa:

Í stjórn NLbhÍ: Formann, gjaldkera, ritara, fulltrúa fyrsta háskólastigs í kennslunefnd LbhÍ, fulltrúa starfsmenntastigs Hvanneyrar í kennslunefnd starfsmenntastigs LbhÍ, ritstjóra heimasíðu NLbhÍ og skemmtanastjóra NLbhÍ.

-Nemendur háskólastigs á Hvanneyri hafa kjörgengi til formanns, gjaldkera, ritara, fulltrúa fyrsta háskólastigs í kennslunefnd LbhÍ,  ritstjóra heimasíðu NLbhÍ og skemmtanastjóra NLbhÍ.

-Nemendur starfsmenntastigs á Hvanneyri hafa kjörgengi til fulltrúa starfsmenntastigs Hvanneyrar í kennslunefnd starfsmenntastigs LbhÍ.

Í skemmtinefnd Hvanneyrar: Fjórir meðstjórnendur. Í skemmtinefnd Hvanneyrar hafa allir nemendur LbhÍ kjörgengi að því tilskyldu að þeir séu nemendur á Hvanneyri.

Auk þess skal kjósa Alþjóðafulltrúa NLbhÍ annað hvert ár. Til Alþjóðafulltrúa NLbhÍ hafa allir háskólanemar LbhÍ kjörgengi.

 

23. gr.

Nemendur á Reykjum skulu starfrækja með sér nemendafélag. Stjórn þess skal skipuð: formanni, varaformanni, ritara, gjaldkera og meðstjórnanda. Um skipan og kosningu í embætti á vegum nemendafélagsins á Reykjum má finna í sérstökum lögum um nemendafélagið á Reykjum. 

Að jafnaði skal formaður nemendafélagsins á Reykjum vera fulltrúi nemenda frá Reykjum í stjórn NLbhÍ, nema annað sé sérstaklega ákveðið. Nemendafélag Reykja velur sér fulltrúa starfsmenntastigsins frá Reykjum í kennslunefnd starfsmenntastigs LbhÍ.

Kjörgengi í nemendafélagið hafa allir nemendur LbhÍ að því tilskyldu að þeir séu í starfs- og endurmenntunardeild á Reykjum.

 

24. gr.

Til kosninga í embætti Nemendafélags Landbúnaðarháskóla Íslands gildir meirihlutakosning. Hljóti einhverjir sama fjölda atkvæða í sama embættið, skal kjósa á milli aðila í viðkomandi embætti. Kosningar skulu vera bindandi og viðhöfð skal leynileg atkvæðagreiðsla. Úrslit kosninga skulu gerð opinber.

 

25. gr.

Ef aðeins einn frambjóðandi býður sig fram í embætti þarf hann að fá minnst 50% fylgi í kosningum til að ná kjöri.

 

26. gr.

Félagsmenn Nemendafélags Landbúnaðarháskóla Íslands geta borið fram vantrausts tillögu á einn eða fleiri stjórnarmeðlimi NLbhÍ. Í kjölfar tillögunar skal boða til aðalfundar eða aukaaðalfundar, sjá 17.grein. Tillagan skal hljóta samþykki 2/3 hluta aðalfundarmanna til þess að hún nái fram að ganga. Hljóti tillagan samþykki skal boða til kjörfundar. 

 

VII. kafli – Ýmislegt

27. gr.

Lögum þessum má aðeins breyta á aðalfundi eða aukaaðalfundi og skulu minnst 2/3 greiddra atkvæða samþykkja lagabreytingar til þess að gildar séu. Félagsmenn Nemendafélags Landbúnaðarháskóla Íslands skulu leitast við að skila tillögum um lagabreytingar til stjórnar NLbhÍ eigi síðar en viku fyrir aðalfund. Lög þessi skulu endurskoðuð árlega af fráfarandi stjórn NLbhÍ og áhugamönnum úr hópi félagsmanna Nemendafélags Landbúnaðarháskóla Íslands. Stjórn NLbhÍ skal leita eftir athugasemdum við lög þessi árlega.

28. gr.

Ef enginn býður sig fram í tiltekið embætti Nemendafélags Landbúnaðarháskóla Íslands eða kosinn fulltrúi hættir, þá skal stjórn NLbhÍ tilnefna einhvern í hans stað eða boða til kosninga hið fyrsta.

 

29. gr.

Ágreining um lög Nemendafélags Landbúnaðarháskóla Íslands skal útkljá fyrir héraðsdómi Vesturlands.

 

30. gr.

Með lögum þessum eru fallin úr gildi öll eldri lagaákvæði Nemendafélags Landbúnaðarháskóla Íslands og þessi lög taka þegar gildi.

 

Samþykkt á aðalfundi 2010

 

-->